Rafeldsneyti

Líkt og aðrar þjóðir Evrópu hefur Ísland skuldbundið sig til að takast á við loftslagsvandann og sett sér mælanleg markmið til að uppfylla skuldbindingar Parísarsamkomulagsins fyrir 2030 og kolefnishlutleysi Íslands fyrir 2040. Notkun jarðefnaeldsneytis í samgöngum veldur um helmingi af þeirri CO2 losun sem er á beinni ábyrgð Íslands. Því er mikilvægt að meta þá kosti sem við höfum og þær fjárfestingar sem þarf til að skipta út jarðefnaeldsneyti fyrir aðra orkugjafa í samgönum á landi, á sjó og lofti. Hluti lausnarinnar er að nota beint endurnýtanlegt rafmagn til að knýja samgöngutæki, en í sumum tilvikum er það ekki raunhæfur möguleiki.

Icefuel (Icelandic Electrical Fuel) hefur fyrir hönd Þróunarfélags Grundartanga, greint valkosti varðandi mögulegt framtíðareldsneyti og gefið út skýrslu með helstu niðurstöðum. Skýrsla þessi snertir á fýsileika þess að framleiða rafeldsneyti á Íslandi auk þess að skýra það hvernig rafeldsneyti getur nýst til að ná loftlagsmarkmiðum.

Bjarni Már Júlíusson, BMJ Consultancy, er stjórnandi verkefnis.
Bjarni hefur þriggja áratuga reynslu af verkefnastjórnun og verkefnum tengdum orku og orkuskiptum, ásamt mikilli þekkingu á orkukerfi Íslands og einnig reynslu af bindingu óæskilegra lofttegunda frá iðnaðarstarfsemi.

Hallmar Halldórsson, Clara Arctic Energy ehf, er tæknilegur ráðgjafi.
Hallmar er sérfræðingur í vetnis- og orkumálum. Hann er framkvæmdastjóri Clara Arctic Energy ehf og hefur meðal annars komið að hönnun og þróun vetnis- og orkuinnviða (vetnisstöðva, rafgreina, og geymslulausna) og starfað sem slíkur á alþjóðlegum vettvangi.

Aðalheiður Kristinsdóttir, Tensio ehf, er verkefnastjóri.
Aðalheiður hefur meðal annars reynslu af almennri verkefnastýringu, greiningarvinnu, áætlunargerð auk þess að hafa reynslu í sölu og rekstrarstýringu.